Vawiin khan I&PR Auditorium, CHANEM Building-ah Champhai District Transformation Programme hnuaia kal mek, Project RISE kaltlangin "Training Program for Women Livelihood Centre" chu Champhai Bawrhsap leh khuallian ni bawk Pu Mohammad Aaquib chuan a hawng.
Khuallian Pu Mohammad Aaquib chuan he hmalakna atana thawk hah tak tak te an awm a, thawhhona pawh a tha a, thil ropui tak an chhawpchhuah avangin lawmthu a sawi a. Training la tur te chuan he programme hi hlawkpuia eizawnna changtlung siamchhuah tum ngei turin a chah a, training pe tur te pawn theihtawp chhuaha zirtirna tha tak pe chhuak ngei turin a fuih a ni.
He hun hi District Urban Development Officer (DUDO) Pu Ngulzathuama'n a kaihruai a, DUDO office atangin Pi Baby Lalremtluangi'n project report tawi a pe a ni. Addl. DC Pu Lalbiakfela leh District Commerce & Industries Officer Pu Vanlalpara te'n fuihna thu an sawi bawk.
He training programme hnuaiah hian hmeichhia 45 an tel dawn a, puan thui hmanga eizawnna hmu thei turin zir an ni ang.